गोविन्द विनोदी
तिम्रो माया छातीभरि सजाएर राख्छु आमा
तिम्रो नाउँको ज्योति सधैँ जगाएर राख्छु आमा
विदेशीको छाया कैल्यै यो माटोमा पर्न दिन्नँ
कसैलाई काँडा मैले यो बाटोमा छर्न दिन्नँ
नेपालीको स्वाभिमानलाई बचाएर राख्छु आमा
तिम्रो नाउँको ज्योति सधैँ जगाएर राख्छु आमा
हिमाल पहाड तराई म जहाँ जाऊँ धर्ती यौटै
जुन जातको भए पनि मैले लाउने पिर्ती यौटै
यो जातीय सद्भावलाई उठाएर राख्छु आमा
तिम्रो नाउँको ज्योति सधैँ जगाएर राख्छु आमा
सम्म पारी फोर्नुपर्नै यहाँ कैयौँ टाकुरा छन्
तीन करोड नेपालीका छ करोड पाखुरा छन्
आफ्नै श्रमले यो भूमिलाई रँगाएर राख्छु आमा
तिम्रो नाउँको ज्योति सधैँ जगाएर राख्छु आमा
तिम्रो माया छातीभरि……..
